مختصر احادیث مبارکہ
حدیث:1۔ رسولِ اکرم ﷺ نے ارشاد فر مایا: تم میں سے کوئی شخص اس وقت تک مومن نہیں ہو سکتا جب تک میں اس کی نظر میں اس کے باپ ،اس کے بیٹے اور تمام لوگوں سے زیادہ محبوب نہ ہو جاؤں۔
[صحیح بخاری،حدیث:۱۵]
حدیث:2۔حضور نبی اکرم ﷺ نے ارشاد فر مایا کہ: بے شک اللہ نے زمین پر حرام کر دیا ہے کہ وہ انبیائے کرام کے جسموں کو کھائے تو اللہ کے نبی زندہ ہیں اور انہیں رزق دیا جاتا ہے۔
[ابن ماجہ،حدیث:۱۶۳۷]
حدیث:3۔ حضور رحمت عالم ﷺ نے ارشاد فر مایا کہ:معراج کی رات میں موسیٰ علیہ السلام کی قبر کے پاس سے گزرا تو دیکھا کہ وہ اپنی قبر میں کھڑے نماز پڑ ھ رہے تھے۔
[صحیح مسلم،حدیث:۲۳۷۵]
حدیث:4۔ حضور شافع یوم النشورﷺ نےارشاد فر مایا کہ:ہر نبی کی ایک خصوصی دعا ہوتی ہے جسے اللہ تعالی ضرور قبول فر ماتا ہے تو ہر نبی نے وہ دعا مانگ لی ،لیکن میں نے اپنی دعا کو قیامت کے دن اپنی امت کی شفاعت کے لئے بچا کر رکھ لیا۔
[صحیح مسلم،حدیث:۲۰۱]
حدیث:5۔ حضرت ابن عباس رضی اللہ عنہما بیان کرتے ہیں کہ: رسول اکرم ﷺ نے ارشاد فر مایا کہ: میں نے اپنے رب تبارک وتعالیٰ کو دیکھا۔
[مسند احمد،حدیث:۲۶۲۳۔۲۶۷۸۔تحت مسند عبد اللہ ابن عباس رضی اللہ عنہما]
حدیث:6۔ رسولِ اکرم صلی اللہ علیہ وسلم نے ارشاد فر مایا کہ:قیامت کے دن مجھ سے سب سے زیادہ قریب وہ شخص ہوگا جو مجھ پر سب سے زیادہ درود بھیجتا ہے۔
[ترمذی،حدیث:۴۸۴]
حدیث:7۔ رسول اللہ ﷺ نے ارشاد فر مایا کہ: وقت پر ادا کی ہوئی نماز،اللہ تعالیٰ کو سب کاموں سے زیادہ پسندیدہ ہے۔
[صحیح بخاری،حدیث:۵۲۷]
حدیث:8۔ رسول اللہ ﷺ نے ارشاد فر مایا کہ: تم میں سب سے افضل شخص وہ ہے جو قرآن مجید سیکھے اور سکھائے۔
[صحیح بخاری،حدیث:۵۰۲۷]
حدیث:9۔ رسول اللہ ﷺ نے ارشاد فر مایا کہ: تم میں سے کوئی کامل مومن اس وقت تک نہیں ہو سکتا جب تک کہ وہ اپنے بھائی کے لئے وہی چیز نہ پسند کرے جو اپنے لئے کرتا ہے۔
[صحیح بخاری ،حدیث:۱۳]
حدیث:10۔ حضور رحمتِ عالم ﷺ نے ارشاد فر مایا کہ:اللہ تعالیٰ اس شخص پر رحم نہیں فر ماتا جو لوگوں پر رحم نہیں کرتا۔
[ترمذی،حدیث:۱۹۲۲]
حدیث:11۔ رسولِ اکرم نورِ مجسم ﷺ نے ارشاد فر مایا کہ:اپنے بھائی کو دیکھ کر مسکرانا بھی صدقہ ہے۔
[ترمذی،حدیث:۱۹۵۶]
حدیث:12۔ حضور اکرم ﷺ نے ارشاد فر مایا کہ: سب سے بڑی زیادتی کسی مسلمان کو بے عزت کرنا ہے۔
[سنن ابو داؤد، حدیث : ۴۸۷۶]
حدیث:13۔ حضور نبی کریم ﷺ نے ارشاد فر مایا کہ:وہ شخص ہم میں سے نہیں جو ہمارے چھوٹوں پر شفقت نہ کرےاور ہمارے بڑوں کی عزت نہ کرے ۔
[ترمذی،حدیث:۱۹۲۰]
حدیث:14۔ حضور نبی کریم ﷺ نے ارشاد فر مایا کہ:تم میں سب سے اچھے وہ ہیں جن کے اخلاق سب سے اچھے ہیں ۔
[صحیح بخاری، حدیث:۶۰۲۹]
حدیث:15۔ نبی کریم ﷺ نے فر مایا کہ:جب بندہ جھوٹ بولتا ہے تو اس کے منہ کی بد بو کی وجہ سے فر شتے اس سے ایک میل دور ہو جاتے ہیں۔
[تر مذی،حدیث:۱۹۷۲]
حدیث:16۔ حضرت قتادہ رضی اللہ عنہ بیان کرتے ہیں کہ:رسول اللہ ﷺ سے پیر کے دن روزہ رکھنے کے بارے میں پو چھا گیا تو آپ ﷺ نے فر مایا : میں اسی دن پیدا ہوا تھا اور اسی دن مجھ پر قرآن نازل ہوا۔
[صحیح مسلم،حدیث:۱۱۶۲]
حدیث:17۔ حضور اکرم ﷺنے ارشاد فر مایا کہ : جماعت سے نماز پڑ ھنا اکیلے نماز پڑ ھنے سے ۲۷/ گنا زیادہ افضل ہے۔
[صحیح بخاری،حدیث:۶۴۵]
حدیث:18۔ حضور اکرم ﷺ نے ارشاد فر مایا کہ :بے شک اللہ کے نزدیک لوگوں میں زیادہ بہتر وہ ہے جو پہلے سلام کرے۔
[ابو داؤد،حدیث:۵۱۹۷]
حدیث:19۔ حضور اکرم ﷺ نے ارشاد فر مایا کہ :جب دو مسلمان آپس میں ملتے ہیں اور مصافحہ کرتے ہیں تو جدا ہو نے سےپہلے ہی اللہ تعالی دونوں کے گناہوں کو بخش دیتا ہے۔
[سنن ابو داود،حدیث:۵۲۱۲]
حدیث:20۔ حضور نبی اکرم ﷺ نے ارشاد فر مایا کہ:جس نے میری قبر کی زیارت کی اس کے لئے میری شفاعت واجب ہو گئی۔
[سنن دار قطنی ،حدیث:۲۶۵۸]
حدیث:21۔ حضور رحمت عالم ﷺ نے ارشاد فر مایا کہ: وہ مسلمان نہیں جس کا پڑوسی اس کی تکلیف سے امان میں نہ ہو ۔
[صحیح بخاری،حدیث:۶۰۱۶]
حدیث:22۔ حضور اکرم ﷺ نے ارشاد فر مایا کہ: جوعورت اس حال میں انتقال کی کہ اس سے اس کا شوہر راضی تھا تو وہ جنتی ہے۔
[تر مذی،حدیث:۱۱۶۱]
حدیث:23۔ ہادی بر حق ﷺ نے ارشاد فر مایا کہ:تم جہاں بھی رہو اللہ سے ڈرتے رہو۔
[تر مذی ،حدیث:۱۹۸۷]
حدیث:24۔ حضور ﷺ نے ارشاد فر مایا کہ: دنیا کی بہترین چیز "نیک عورت" ہے۔
[صحیح مسلم ،حدیث:۱۴۶۷]
حدیث:25۔ حضور اکرم ﷺ نے ارشاد فر مایا کہ: یتیم بچوں کی پرورش کر نے والا میرے ساتھ جنت میں داخل ہو گا۔
[بخاری ، حدیث:۶۰۰۵]
حدیث:26۔ حضور اکرم ﷺ نے ارشاد فر مایا کہ:امانت دار تاجر قیامت کے دن انبیاء،صدیقین اور شہدا کے ساتھ ہوں گے۔
[تر مذی،حدیث:۱۲۰۹]
حدیث:27۔ حضور اکرم ﷺ نے ارشاد فر مایا کہ:سچائی،نیکی کی طرف لے جاتی ہے اور نیکی جنت کی طرف لے جاتی ہے۔اورجھوٹ برائی کی طرف لے جاتی ہے اور برائی جہنم کی طرف لے جاتی ہے۔
[صحیح بخاری،حدیث:۶۰۹۴]
حدیث:28۔ حضور ﷺ نے ارشاد فر مایا کہ:جنت میں زیادہ تر لوگ تقویٰ اور اچھے اخلاق کی وجہ سے جائیں گے اور جہنم میں زیادہ تر لوگ زبان اور شرم گاہ کی وجہ سے جائیں گے
[ المستدرک للحاکم،حدیث:۷۹۱۹]
حدیث:29۔ حضور ﷺ نے ارشاد فر مایا کہ: جس گھر میں کتا یا جاندار کی تصویر ہوتی ہے اس میں فر شتے نہیں جاتے ہیں۔
[مسلم، حدیث:۲۱۰۶]
حدیث:30۔ حضور شافع یوم النشور ﷺ نے ارشاد فر مایا کہ:قیامت کے دن ہر شخص اسی کے ساتھ ہو گا جس سے وہ دنیا میں محبت کرتا ہوگا۔
[صحیح بخاری، حدیث:۶۱۶۸]
حدیث:31۔ حضور اکرم ﷺ نے ارشاد فر مایا کہ :خود کو جہنم سے بچاؤاگر چہ کھجور کے ٹکڑے ہی سے ہو اور اگر وہ بھی نہ پاؤتو اچھی بات ہی کے ذریعے۔
[بخاری، حدیث :۶۰۲۳]
حدیث:32۔ حضور اکرم ﷺ نے ارشاد فر مایا کہ: جنت میں ایک کوڑے بھر کی جگہ دنیا اور اس میں جو کچھ بھی ہے سب سے بہتر ہے۔
[بخاری،حدیث:۶۴۱۵]
حدیث:33۔ حضور اکرم ﷺ نے ارشاد فر مایا کہ:ہر امت کے لئے ایک فتنہ ہے اور میری امت کافتنہ مال ودولت ہے۔
[المستدرک للحاکم ،حدیث:۷۸۹۶]
حدیث:34۔ نبی کریم ﷺ نے ارشاد فر مایا کہ: جو شخص اللہ سے ملنے کو پسند کرتا ہے اللہ تعالیٰ بھی اس سے ملنے کو پسند کرتا ہے،اور جو شخص نا پسند کرتا ہے اسے اللہ تعالیٰ بھی نا پسند کرتا ہے۔
[صحیح بخاری،حدیث:۶۵۰۸]
حدیث:35۔ حضور نبی کریم ﷺ نے ارشاد فر مایا کہ: آدمی کا اپنا مال وہی ہے جو اس نے اپنی موت سے پہلے اپنے لئے آگے بھیجا ،اور جو چھوڑ کر مرا وہ تو اس کے وارثوں کا ہے۔
[صحیح بخاری،حدیث:۶۴۴۲]
حدیث:36۔ سیدہ عائشہ صدیقہ رضی اللہ عنہا بیان کرتی ہیں کہ :نبی کریم ﷺ کو سب سےز یادہ پسندیدہ وہ عمل تھا جس کو انسان ہمیشہ کر سکے۔
[صحیح بخاری،حدیث: ۶۴۶۲]
حدیث:37۔ نبی کریم ﷺ نے ارشاد فر مایا کہ:جب تم میں سے کوئی کسی ایسے شخص کو دیکھے جو شکل وصورت اور مال و دولت میں بڑھ کے ہو تواسے اپنے سے کم درجہ والے لوگوں کی طرف دھیان دینا چاہئے۔
[صحیح بخاری،حدیث:۶۴۹۰]
حدیث:38۔ نبی کریم ﷺ نے ارشاد فر مایا کہ:جنت تم سے تمہارے جوتے کے تسمے سے بھی زیادہ قریب ہے اور اسی طرح سے دوزخ بھی۔
[صحیح بخاری،حدیث:۶۴۸۸]
حدیث:39۔ حضور اکرم ﷺ نے ارشاد فر مایا کہ:زیادہ بچے جننے والی ،محبت کرنے والی عورتوں سے نکاح کرو، کیو نکہ قیامت کے دن میں اپنی امت کی کثرت پر فخر کروں گا۔
[سنن نسائی، حدیث:۳۲۲۷]
حدیث:40۔ حضور اکرم ﷺ نے ارشاد فر مایا کہ:جس نے کسی بیوہ عورت کی تعزیت کی اور اسے تسلی دیا تو اللہ تعالی اسے جنت میں چادر عطا فر مائے گا۔
[ ترمذی ،حدیث:۱۰۷۶]
حدیث:41۔ حضور اکرم ﷺ نے ارشاد فر مایا کہ:تین چیزوں میں تاخیر نہ کرو۔۱: نماز،جب اس کا وقت ہو جائے۔۲: جنازہ، جب حاضر ہو جائے،۳: کنواری لڑکی کی شادی، جب کوئی مناسب رشتہ مل جائے۔
[ترمذی،حدیث:۱۰۷۵]
حدیث:42۔ حضور اکرم ﷺ نے ارشاد فر مایا کہ: مومن کی جان اس کے قر ض میں گھرا رہتا ہے جب تک کہ اس کی طرف سے ادا نہ کر دیا جائے۔
[ترمذی، حدیث:۱۰۷۸]
حدیث:43۔ حضور اکرم ﷺ نےصحابہ سےارشاد فر مایا کہ:میں اپنے پیچھے ایسے ہی دیکھتا ہوں جیسے اپنے آگے دیکھتا ہوں اور مجھ پر تمہارے دل کے اندر چھپے خشوع اورخضوع بھی پو شیدہ نہیں ہے۔
[صحیح بخاری،حدیث:۷۴۱]
حدیث:44۔ حضور اکرم ﷺ نے ارشاد فر مایا کہ: میرے صحابہ کو گالی نہ دینا،قسم بخدا، اگر تم میں سے کوئی اُحد پہاڑ کے برابر سونا ،راہِ خدا میں خرچ کرے گا تب بھی ان کے ایک "مد" صدقہ کے برابر نہ ہوگا بلکہ ان کے آدھے"مُدْ" کے برابر بھی نہ پہونچے گا۔
[صحیح بخاری،حدیث:۳۶۷۳]
حدیث:45۔ رسول کریم ﷺ نے ارشاد فر مایا کہ:اللہ تعالی اس بندے سے خوش ہوتا ہے جو کچھ کھانے یا پینے کے بعد "الحمد للہ" کہتا ہے۔
[صحیح مسلم ،حدیث:۲۷۲۴۔ترمذی،حدیث:۱۸۱۶]
حدیث:46۔ حضور نبی کریم ﷺ نے ارشاد فر مایا کہ:سب سے بُرا اُس ولیمے کا کھانا ہے جس میں مالداروں کو بلایا گیا ہو اور مسکینوں کو چھوڑ دیا گیا ہو۔
[سنن ابو داؤد،حدیث:۳۷۴۲]
حدیث:47۔ حضور رحمت عالم ﷺ نے ارشاد فر مایا کہ:جس نے بدلہ لینے کی طاقت کے باوجود غصہ کو پی گیا تو قیامت کے دن اللہ تعالیٰ اُسے اختیار دے گا کہ جس "حور " کو چا ہے لے لے۔
[سنن ابو داؤد،حدیث:۴۷۷۷]
حدیث:48۔ حضور اکرم ﷺ نے ارشاد فر مایا کہ:بے شک حیا ایمان کا حصہ ہے۔
[صحیح بخاری،حدیث:۲۴]
حدیث:49۔ حضور اکرم ﷺ نے ارشاد فر مایا کہ:راستے سے تکلیف دینے والی چیز کو ہٹا دینا صدقہ ہے۔
[ترمذی،حدیث:۱۹۵۶]
حدیث:50۔ رسول کریم ﷺ نے ارشاد فر مایا کہ:جب تم بہت زیادہ تعریف کرنے والے شخص سے ملو تو اس کے منہ میں مٹی ڈال دو۔
[مسلم،حدیث:۳۰۰۲]
حدیث:51۔ حضور ﷺ نے ارشاد فر مایا کہ:جو دنیا میں دو چہرے والا ہے قیامت کے دن اس کی دو آگ کی زبان ہو گی۔
[ابو داؤد،حدیث:۴۸۷۳]
حدیث:52۔ حضور نبی کریم ﷺ نے ارشاد فر مایا کہ:حسد کرنے سے بچو کیونکہ وہ نیکیوں کو ایسے کھا جاتی ہے جیسے آگ لکڑی کو ۔
[ابوداؤد،حدیث:۴۹۰۳]
حدیث:53۔ رسول اللہ ﷺ نے ارشاد فر مایا کہ:بے شک اللہ تعالیٰ نے مجھے وحی فر مائی کہ:تم لوگ اس طرح تواضع کرو کہ کوئی کسی پر سر کشی نہ کرے اور نہ ہی کوئی کسی پر فخر کرے۔
[صحیح مسلم،حدیث:۲۸۶۵]
حدیث:54۔ حضور اکرم ﷺ نے ارشاد فر مایا کہ:تم اپنے مر حومین کی اچھائیوں کو بیان کرو اور ان کی بُرائیوں سے زبان کو بند رکھو۔
[ابوداؤد،حدیث:۴۹۰۰]
حدیث:55۔ حضور نبی کریم ﷺ نے فر مایا کہ:کسی مسلمان کے لئے جائز نہیں ہے کہ وہ اپنے مسلمان بھائی سے تین دن سے زیادہ بات چیت بند رکھے۔ان دو نوں میں زیادہ اچھا وہ ہے جو پہلے سلام کرے۔
[سنن ابو داؤد،حدیث:۴۹۱۰]
حدیث:56۔ حضور ﷺ نے ارشاد فر مایا کہ:بے شک دین خیر خواہی کا نام ہے۔
[صحیح مسلم،حدیث:۵۵]
حدیث:57۔ حضور نبی کریم ﷺ نے ارشاد فر مایا کہ:بے شک اللہ تعالیٰ بندے کی مدد کرتا رہتا ہے جب تک بندہ اپنے بھائی کی مدد میں لگا رہتا ہے۔
[سنن ابوداؤد،حدیث:۴۹۴۶]
حدیث:58۔ حضور اکرم ﷺ نے ارشاد فر مایا کہ:بے شک قیامت کے دن تمہیں تمہارے اور تمہارے باپوں کے نام سے پکارا جائے گا تو تم اپنے نام اچھے رکھو۔
[سنن ابوداؤد،حدیث:۴۹۴۸]
حدیث:59۔ حضور نبی کریم ﷺ نے ارشاد فر مایا کہ:بد اخلاق مالک جنت میں داخل نہ ہوگا۔
[ترمذی،حدیث:۱۹۴۶]
حدیث:60۔ حضور نبی کریم ﷺ نے ارشاد فر مایا کہ:جو لوگوں کا شکریہ ادا نہیں کرتا وہ اللہ کا شکر ادا نہیں کرتا۔
[ترمذی،حدیث:۱۹۵۵]
حدیث:61۔ حضور نبی کریم ﷺ نے ارشاد فر مایا کہ:بیوہ اور مسکین کے لئے کو شش کرنے والا اللہ کے راستے میں جہاد کرنے والے کی طرح ہے یا اس شخص کی طرح ہے جو دن میں روزہ رکھتا ہے اور رات کو قیام کرتا ہے۔
[بخاری،حدیث:۵۳۵۳]
حدیث:62۔ حضور اکرم ﷺ نے ارشاد فر مایا کہ:وہ دعا بہت جلد قبول ہوتی ہے جو ایک غائب دوسرے غائب کے لئے کرتا ہے۔
[ترمذی،حدیث:۱۹۸۰]
حدیث:63۔ حضور ﷺ نے فر مایا کہ:دو گالی دینے والے نے جو کچھ کہا،اس کا گناہ شروع کرنے والے پر ہے جبکہ مظلوم حد سے نہ گزرے۔
[مسلم،حدیث:۲۵۸۷]
حدیث:64۔ حضور اکرم ﷺ نے ارشاد فر مایا کہ: جس نے حق پر رہتے ہوئے نہ جھگڑا کیا تو اس کے لئے جنت کے بیچ میں محل بنایا جائے گا۔
[ترمذی،حدیث:۱۹۹۳]
حدیث:65۔ حضور اکرم ﷺ نے ارشاد فر مایا کہ:لوگوں میں انتہائی بُرا آدمی وہ ہے جس کی بے حیائی سے بچنے کے لئے لوگ اس سے کنارہ کشی کریں۔
[بخاری ،حدیث:۳۱۳۲]
حدیث:66۔ حضور انور ﷺ نے ارشاد فر مایا کہ:جس کے دل میں ذرہ برابر بھی تکبر ہو گا ،وہ جنت میں نہیں جائے گا۔
[ترمذِی،حدیث:۱۹۹۸]
حدیث:67۔ حضور سید المر سلین ﷺ نے ارشاد فر مایا کہ:قیامت کے دن مومن کے میزانِ عمل میں "اچھے اخلاق"سے زیادہ وزنی کوئی چیز نہ رکھی جائے گی۔
[ ترمذی،حدیث:۲۰۰۲]
حدیث:68۔ حضور آقائے کریم ﷺ نے ارشاد فر مایا کہ:اگر لوگ تمہارے ساتھ اچھائی کرے تو تم بھی اچھائی کرو،لیکن اگر وہ ظلم کرے تو تم ظلم نہ کرو۔
[ترمذی،حدیث:۲۰۰۷]
حدیث:69۔ رسول کریم ﷺ نے ارشاد فر مایا کہ:مظلوم کی بد دعا سے بچو کیو نکہ اس کے اور اللہ کے درمیان کوئی پردہ نہیں ہوتا۔
[بخاری،حدیث:۱۴۹۶]
حدیث:70۔ حضور اکرم ﷺ نے ارشاد فر مایا کہ:مجھے بہت زیادہ بولنے والے،زبان درازی کرنے والے اور تکبر کرنے والے لوگ،بہت ہی ناپسند ہیں اور وہ لوگ قیامت کے دن مجھ سے بہت دور ہوں گے۔
[ترمذی،حدیث:۲۰۱۸]
حدیث:71۔ حضور اکرم ﷺ نے ارشاد فر مایا کہ:جو نوجوان کسی بوڑھے شخص کی تعظیم اس کی عمر کی وجہ سے کرتا ہےتو اللہ تعالیٰ اُس نوجوان کے لئے ایسے شخص کو پیدا کردیتا ہے جو اس کی بوڑھاپے میں تعظیم کرے۔
[ترمذی،حدیث:۲۰۲۲]
حدیث:72۔ حضور ﷺ نے ارشاد فر مایا کہ:قیامت کے دن اللہ کے نزدیک سب سے بُرا دوچہرےوالا{یعنی دوغلا آدمی} ہوگا۔
[بخاری،حدیث:۶۰۵۸]
حدیث:73۔ حضور سرورِ مدینہ ﷺ نے ارشاد فر مایا کہ:صدقہ دینے سے مال کم نہیں ہوتا،اور معاف کر دینے سے اللہ تعالیٰ اس کی عزت کو بڑھاتا ہےاور جو شخص اللہ کے لئے جھکتا ہے تو اللہ تعالیٰ اس کو بلند فر مادیتا ہے۔
[صحیح مسلم،حدیث:۲۵۸۸]
حدیث:74۔ حضور اکرم ﷺ نے ارشاد فر مایا کہ:ایک باپ کا اپنے بیٹے کے لئے سب سے اچھا تحفہ اچھا ادب سکھاناہے۔
[شعب الایمان،حدیث:۱۵۵۳]
حدیث:75۔ رسول کریم ﷺ نے ارشاد فر مایا کہ:مومن کو جو بھی تکلیف پہونچتی ہے اللہ تعالیٰ اس کی وجہ سے اس کے گناہ کو مٹادیتا ہے۔
[مسلم،حدیث:۲۵۷۲]
حدیث:76۔ حضور اکرم ﷺ نے ارشاد فر مایا کہ:جب کوئی ایسا شخص تمہیں نکاح کا پیغام دے جس کے دین اور اخلاق سے تم راضی ہو تو اس سے اپنی بیٹی کا نکاح کردو،اور اگر تم ایسا نہ کروگے تو زمین میں فتنہ اور بڑا فساد ہوگا۔
[تر مذی،حدیث:۱۰۸۴]
حدیث:77۔ حضور نبی کریم ﷺ نے ارشاد فر مایا کہ:بد کار ہیں وہ عورتیں جو اپنا نکاح بغیر گواہوں کے کرتی ہیں ۔
[ترمذی،حدیث:۱۱۰۳]
حدیث:78۔ حضور نبی کریم ﷺ نے ارشاد فر مایا کہ:عورت پردے میں رہنے کی چیز ہے تو جب وہ گھر سے نکلتی ہے تو اُسے شیطان ٹکٹکی باندھ کر دیکھتا ہے۔
[ ترمذی،حدیث:۱۱۷۳]
حدیث:79۔ نبی کریم ﷺ نے ارشاد فر مایا کہ:دنیا میں جب کوئی بیوی اپنے شوہر کو تکلیف دیتی ہے تو "حورِ عین "میں سے اس کی بیوی کہتی ہے"اللہ تجھے ہلاک کرے،اس کو تکلیف مت دو،وہ تو تمہارے پاس بس کچھ لمحوں کے لئے ہے عنقریب وہ تم سے جدا ہو کر ہمارے پاس آنے والا ہے۔
[ترمذی،حدیث:۱۱۷۴]
حدیث:80۔ حضور نبی کریم ﷺ نے ارشاد فر مایا کہ:جو کسی تنگ دست قرضدار کو مہلت دیتا ہے یا قرض معاف کر دیتا ہے ،اللہ تعالیٰ اُسے قیامت کے دن عرش کا سایہ نصیب فر مائے گا ،جبکہ اُس دن اس کے علاوہ کوئی سایہ نہ ہوگا۔
[ترمذِی،حدیث:۱۳۰۶]
حدیث:81۔
حضور نبی کریم ﷺ نے ارشاد فر مایا کہ:دو آنکھوں کو جہنم کی آگ نہ چھوئے گی،ایک وہ جس نے خوف الہٰی میں آنسو بہائی ، اور دوسری وہ جو رات کو جاگ کر اللہ کے راستے میں پہرہ دیتی رہی۔
[ترمذی،حدیث:۱۶۳۹]
حدیث:82۔ حضور نبی کریم ﷺ نے ارشاد فر مایا کہ:جو سچے دل سے شہادت کی دعا کرتا ہے تو اللہ تعالیٰ اسے شہیدوں کا مرتبہ عطا فر مائے گا اگر چہ وہ اپنے بستر پر انتقال کرے۔
[صحیح مسلم،حدیث:۱۹۰۹]
حدیث:83۔ حضور نبی کریم ﷺ نے ارشاد فر مایا کہ:سب سے افضل جہاد ظالم بادشاہ کے سامنے حق بات بولنا ہے۔
[المستدرک، حدیث:۴۸۷۸]
حدیث:84۔ حضور اکرم ﷺ نے ارشاد فر مایا کہ:دو قطرے اللہ تعالیٰ کو سب سے زیادہ پسند ہیں،ایک آنسو کا قطرہ جو خوف الٰہی میں گِرےاور دوسرا خون کا قطرہ جو اللہ کے راستے میں گِرے۔
[ترمذی،حدیث:۱۶۶۹]
حدیث:85۔ حضور اکرم ﷺ نے ارشاد فر مایا کہ:بہت سی عورتیں کپڑا پہن کے بھی ننگی ہوں گی وہ خودراہ حق سے ہٹی ہوں گی اور دوسروں کو ہٹانے والی ہوں گی، وہ جنت کی خوشبو بھی نہیں پائیں گی۔
[صحیح مسلم ،حدیث:۲۱۲۸]
حدیث:86۔ حضور اکرم ﷺ نے ارشاد فر مایا کہ:بھنوں کے بال بنانے والی اور بنوانے والی عورتوں پر اللہ تعالیٰ نے لعنت فر مایا ۔
[صحیح بخاری،حدیث:۵۹۳۵]
حدیث:87۔ حضرت ابن عباس رضی اللہ عنہما بیان کرتے ہیں کہ:رسول اللہ ﷺ نے اُن مردوں پر لعنت فر مائی جو عورتوں سے مشابہت اختیار کرتے ہیں اور اُن عورتوں پر لعنت فر مائی جو مردوں سے مشابہت اختیار کرتی ہیں۔
[بخاری،حدیث:۵۸۸۵]
حدیث:88۔ حضور نبی کریم ﷺ نے ارشاد فر مایا کہ:جو اللہ تعالیٰ کی اطاعت کی منت مانے وہ اللہ کی اطاعت کرے اور جو گناہ کے کام کی منت مانگے وہ گناہ نہ کرے۔
[بخاری،حدیث:۶۶۹۶]
حدیث:89۔ حضور نبی کریم ﷺ نے ارشاد فر مایا کہ:جب تم میت کی نماز جنازہ پڑ ھ چکو تو اس کے لئے خلوص دل سے دعا کرو۔
[ابوداؤد،حدیث:۳۱۹۹]
حدیث:90۔ حضور نبی کریم ﷺ نے ارشاد فر مایا کہ:اللہ کے نزدیک بہترین ساتھی وہ ہے جو اپنے ساتھی کے حق میں بہتر ہے اور اللہ کے یہاں بہترین پڑوسی وہ ہے جو اپنے پڑوسی کے حق میں بہتر ہے۔
[ترمذی،حدیث:۱۹۴۴]
حدیث:91۔ حضور اکرم ﷺ نے ارشاد فر مایا کہ:ایک ساتھ مل کر کھایا کرو،الگ الگ نہ کھاؤ،کیو نکہ برکت مِل کر کھانے سے حاصل ہوتی ہے۔
[ابن ماجہ،حدیث:۳۳۸۷]
حدیث:92۔ حضور اکرم ﷺ نے ارشاد فر مایا کہ:جو مجھے اپنی زبان اور شرمگاہ کی ضمانت دے میں اس کو جنت کی ضمانت دیتا ہوں۔
[صحیح بخاری،حدیث :۶۴۷۴]
حدیث:93۔ حضور آقائے کریم ﷺ نے ارشاد فر مایا کہ:آدمی کے اسلام کی خوبصورتی یہ ہے کہ وہ بے فائدہ کاموں کو چھوڑدے۔
[ترمذی،حدیث:۲۳۱۷]
حدیث:94۔ حضور نبی کریم ﷺ نے حضرت انس رضی اللہ عنہ سے فر مایا کہ:بیٹے!جب گھر میں داخل ہو تو گھر والوں کو سلام کیا کرو،اس سے تمہارے لئے اور تمہارے گھر والوں کے لئے برکت ہوگی۔
[ترمذی،حدیث:۲۶۹۸]
حدیث:95۔ حضور نبی کریم ﷺ نے ارشاد فر مایا کہ:تم میں سے ہر ایک نگراں ہے اور ہر ایک سے اس کی رعایا کےبارے میں پو چھا جائے گا۔
[صحیح بخاری،حدیث:۲۵۵۴]
حدیث:96۔ حضور نبی کریم ﷺنے ارشاد فر مایا کہ:تحفوں کی تقسیم میں اپنے اولاد کے درمیان برابری کرو،اگر میں کسی کو کسی پر فضیلت دیتا تو میں بیٹیوں کو بیٹوں پر فضیلت دیتا۔
[طبرانی،حدیث:۱۱۹۹۷]
حدیث:97۔ حضور اکرم ﷺ نے ارشاد فر مایا کہ:تمہارے ماں باپ تمہارے لئے جنت بھی ہیں اور دوزخ بھی۔
[ابن ماجہ، حدیث :۳۶۶۲]
حدیث:98۔ حضور نبی کریم ﷺ نے ارشاد فر مایا کہ:جس نے اللہ کے لئے دوستی کیا اور اللہ ہی کے لئے دشمنی کیا،اللہ کے لئے دیا اور اللہ ہی کے لئے نہیں دیا،تو اس نے اپنا ایمان مکمل کر لیا۔
[سنن ابو داؤد،حدیث:۴۶۸۱]
حدیث:99۔ حضور اکرم ﷺ نے ارشاد فر مایا کہ:جو اللہ اور قیامت کے دن پر ایمان رکھتا ہے اُسے چاہئے کہ جب بولے تو اچھی بات بولے،نہیں تو خاموش رہے۔
[بخاری،حدیث:۶۴۷۵]
حدیث:100۔ حضور اکرم ﷺ نے ارشاد فر مایا کہ: مسلمان وہ ہے جس کی زبان اور ہاتھ سے دوسرا مسلمان محفوظ رہے۔
[بخاری،حدیث:۱۰]